MS8NEWS(గోదావరిఖని/రామగుండం – డిసెంబర్ 17, 2025):సింగరేణి సంస్థలో దశాబ్దాలుగా అపరిష్కృతంగా ఉన్న ‘మారుపేర్ల’ (Alias Names) సమస్యను వెంటనే పరిష్కరించి, అర్హులైన వారసులకు ఉద్యోగాలు కల్పించాలని డిమాండ్ చేస్తూ నేడు ఆర్జీ-1 (RG1) ఏరియాలోని 1వ మరియు 3వ ఇంక్లైన్ గనుల వద్ద బాధితులు వినూత్న నిరసన చేపట్టారు. గని పరిసరాల్లో “వాల్పేపర్ స్టిక్కరింగ్” (Wallpaper Stickering) ద్వారా తమ నిరసనను తెలియజేశారు.
ఈ సందర్భంగా మారుపేర్ల కార్మికుల పిల్లలు (Dependents) మాట్లాడుతూ.. గత అసెంబ్లీ ఎన్నికల సమయంలో ప్రస్తుత ముఖ్యమంత్రి రేవంత్ రెడ్డి మరియు కాంగ్రెస్ ప్రభుత్వం సింగరేణి బాధితులకు అండగా ఉంటామని, అధికారంలోకి రాగానే మారుపేర్ల సమస్యను పరిష్కరిస్తామని స్పష్టమైన హామీ ఇచ్చారని గుర్తు చేశారు. కానీ ప్రభుత్వం ఏర్పడి ఇన్ని రోజులవుతున్నా, తమ గోడును పట్టించుకోవడం లేదని ఆవేదన వ్యక్తం చేశారు.
ఏళ్ల తరబడి ఉద్యోగాలు లేక, ఆర్థిక ఇబ్బందులతో సతమతమవుతూ, తీవ్రమైన మానసిక ఒత్తిడికి మరియు అనారోగ్య సమస్యలకు గురవుతున్నామని వారు వాపోయారు. ఇప్పటికే పలుమార్లు చిన్నపాటి సమ్మెలు, ధర్నాలు చేసినా ప్రభుత్వం గానీ, యాజమాన్యం గానీ స్పందించలేదని ఆగ్రహం వ్యక్తం చేశారు.
తమ న్యాయమైన డిమాండ్ల సాధన కోసం గనులలో పనిచేస్తున్న తోటి పర్మినెంట్ కార్మికులు (Payroll Employees) కూడా మద్దతు ఇవ్వాలని, అందరూ కలిసి సమ్మెకు సిద్ధం కావాలని కోరుతూ గనుల గోడలపై స్టిక్కర్లు అతికించి ప్రచారం నిర్వహించారు. ప్రభుత్వం ఇప్పటికైనా స్పందించి తమకు న్యాయం చేయకపోతే ఉద్యమాన్ని మరింత ఉధృతం చేస్తామని హెచ్చరించారు. కార్యక్రమంలో లక్క శ్రావణ్ గౌడ్, దన్నాడ రాజు, సదానందం, ఒంప్రకాశ్, అరవింద్, సాయికిరణ్, డిష్ బాబు, ఈర్ల రాజయ్య, సందీప్, శ్రీనివాస్, హరీష్ యాదవ్, తదితరులు పాల్గున్నారు.