MS8NEWS జనవరి 22 విశాఖపట్నం: నగరంలోని తాటిచెట్లపాలెం వద్ద గురువారం ఒక ప్రైవేట్ ట్రావెల్స్ ఏసీ బస్సులో భారీ అగ్నిప్రమాదం సంభవించింది. డ్రైవర్ అప్రమత్తతతో వ్యవహరించడంతో ప్రయాణికులందరూ సురక్షితంగా బయటపడ్డారు, తద్వారా ఒక పెద్ద ప్రాణాపాయం తప్పింది.ప్రైవేట్ ట్రావెల్స్కు చెందిన ఏసీ బస్సు ప్రయాణికులతో వెళ్తుండగా, తాటిచెట్లపాలెం జంక్షన్ సమీపంలో ఒక్కసారిగా ఇంజిన్ నుంచి పొగలు రావడం గమనించిన డ్రైవర్, వెంటనే బస్సును రోడ్డు పక్కన నిలిపివేశారు.బస్సు ఆగగానే ప్రయాణికులందరినీ త్వరగా కిందకు దిగిపోవాలని డ్రైవర్ హెచ్చరించారు.నిమిషాల వ్యవధిలోనే మంటలు బస్సు మొత్తానికి వ్యాపించాయి. దట్టమైన పొగలు కమ్ముకోవడంతో స్థానికులు భయాందోళనకు గురయ్యారు. సమాచారం అందుకున్న అగ్నిమాపక సిబ్బంది వెంటనే ఘటనా స్థలానికి చేరుకుని మంటలను అదుపు చేశారు.
ప్రయాణికులు సురక్షితం ప్రమాద సమయంలో బస్సులో ఉన్న ప్రయాణికులందరూ సురక్షితంగా బయటపడటంతో అందరూ ఊపిరి పీల్చుకున్నారు. షార్ట్ సర్క్యూట్ కారణంగానే ఈ ప్రమాదం జరిగి ఉండవచ్చని ప్రాథమికంగా భావిస్తున్నారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.