MS8NEWS ఖిల్లాఘనపురం, జనవరి 18: వనపర్తి నియోజకవర్గం ఖిల్లాఘనపురం మండలం పరిధిలోని మామిడిమాడ ముందరి తండాలో ఆదివారం గంజాయి విక్రయాలు, మత్తులో యువకుడి వీరంగం తీవ్ర కలకలం రేపాయి.
ఘటన వివరాల్లోకి వెళ్తే:తండాకు చెందిన మహేష్ అనే యువకుడు గంజాయి విక్రయిస్తూ, తానే స్వయంగా మత్తుకు బానిసయ్యాడు. ఈ క్రమంలో ఆదివారం విచక్షణ కోల్పోయిన మహేష్, చేతిలో పెద్ద కత్తి పట్టుకొని స్థానికులను భయాందోళనకు గురిచేశాడు. గంజాయి మత్తులో ఊగిపోతూ దారి వెంట వెళ్లే వారిపై దాడికి యత్నించడంతో గ్రామస్తులు ప్రాణభయంతో పరుగులు తీశారు.
గ్రామస్తుల సాహసం.. పోలీసుల నిర్లక్ష్యం?
మహేష్ కత్తితో దాడి చేసేందుకు ప్రయత్నిస్తుండగా, తండావాసులు సమష్టిగా సాహసం చేసి అతడిని అదుపులోకి తీసుకున్నారు. అనంతరం నిందితుడిని పోలీసులకు అప్పగించారు. అయితే, నిందితుడిని పట్టుకుని అప్పగించినా పోలీసులు ఇప్పటివరకు కేసు నమోదు చేయలేదని స్థానికులు ఆరోపిస్తున్నారు.
”గంజాయి మత్తులో కత్తి పట్టుకుని మాపై పడుతుంటే ప్రాణాలు అరచేతిలో పెట్టుకుని పట్టుకున్నాం. కానీ పోలీసులు నిందితుడిపై చర్యలు తీసుకోకపోవడం దారుణం.” > — స్థానిక తండా వాసులు
గ్రామాల్లో విచ్చలవిడిగా దొరుకుతున్న గంజాయి యువతను నాశనం చేస్తోందని, ఇప్పటికైనా ఉన్నతాధికారులు స్పందించి కఠిన చర్యలు తీసుకోవాలని తండా ప్రజలు డిమాండ్ చేస్తున్నారు.