(MS8NEWS జనవరి 6)రామగుండం: రాజకీయ నాయకుడంటే కేవలం విమర్శలు, ప్రతి విమర్శలే కాదు.. ఆపదలో ఉన్నవారికి అండగా నిలబడడమే నిజమైన సేవా భావం అని నిరూపించారు NSUI రామగుండం నియోజకవర్గ అధ్యక్షులు దాసరి విజయ్ కుమార్.
స్థానిక 11వ డివిజన్ జ్యోతి నగర్కు చెందిన ఈదునూరి రవి అనే వ్యక్తి ఈరోజు సాయంత్రం తీవ్ర అస్వస్థతకు గురయ్యారు. ఒక్కసారిగా బీపీ (రక్తపోటు) పడిపోవడంతో ఆయన అపస్మారక స్థితిలోకి చేరుకున్నారు. ప్రాణాపాయ స్థితిలో ఉన్న రవి గురించి సమాచారం అందిన వెంటనే దాసరి విజయ్ కుమార్ ఏమాత్రం ఆలస్యం చేయకుండా అక్కడికి చేరుకున్నారు.రవిని హుటాహుటిన శారదా నగర్లోని ప్రభుత్వ జనరల్ ఆసుపత్రికి తరలించారు. ఆసుపత్రికి చేరుకున్నాక కూడా స్వయంగా వీల్ చైర్ తోసుకుంటూ రవిని అత్యవసర విభాగంలోని వైద్యుల వద్దకు తీసుకెళ్లారు. విజయ్ కుమార్ చూపిన చొరవతో వైద్యులు తక్షణమే చికిత్స ప్రారంభించారు. ప్రస్తుతం రవి ఆరోగ్యం నిలకడగా ఉన్నట్లు సమాచారం.
”ఆపదలో ఉన్న వ్యక్తిని ఆసుపత్రికి తరలించి, చికిత్స అందే వరకు అక్కడే ఉండి విజయ్ కుమార్ చూపిన మానవత్వం అందరినీ ఆకట్టుకుంది.”సకాలంలో స్పందించి ఒక ప్రాణాన్ని కాపాడిన దాసరి విజయ్ కుమార్పై స్థానిక ప్రజలు మరియు బాధితుడి కుటుంబ సభ్యులు ప్రశంసల వర్షం కురిపిస్తున్నారు.