MS8NEWS జనవరి 16:గోదావరిఖని:రాబోయే సమ్మక్క-సారాలమ్మ జాతరను పురస్కరించుకుని భక్తులకు ఎలాంటి అసౌకర్యాలు కలగకుండా పక్కాగా ఏర్పాట్లు చేయాలని రామగుండం ఎమ్మెల్యే మక్కాన్ సింగ్ రాజ్ ఠాకూర్ అధికారులను ఆదేశించారు. శుక్రవారం ఆయన సింగరేణి ఆర్జీ-1 జీఎం లలిత్ కుమార్ తో కలిసి జాతర మైదానాన్ని, జరుగుతున్న పనులను క్షేత్రస్థాయిలో పరిశీలించారు.జాతర ప్రాంగణంలో భక్తుల రద్దీని దృష్టిలో ఉంచుకుని క్యూ లైన్లు, తాగునీరు, విద్యుత్ దీపాలు మరియు పారిశుద్ధ్య పనులపై ఎమ్మెల్యే ప్రత్యేకంగా చర్చించారు. ఈ సందర్భంగా ఆయన మాట్లాడుతూ.. రాష్ట్రం నలుమూలల నుండి వచ్చే భక్తులకు ఎక్కడా ఇబ్బంది కలగకుండా అన్ని మౌలిక వసతులు యుద్ధప్రాతిపదికన పూర్తి చేయాలని సూచించారు. సింగరేణి యాజమాన్యం, స్థానిక యంత్రాంగం సమన్వయంతో పనిచేయాలని కోరారు.
అనంతరం, సంక్రాంతి పండుగను పురస్కరించుకుని ఏర్పాటు చేసిన వేడుకల్లో ఎమ్మెల్యే రాజ్ ఠాకూర్ పాల్గొన్నారు. కార్యకర్తలు, నాయకులతో కలిసి సరదాగా గాలిపటాలు ఎగురవేసి సందడి చేశారు. పండుగ పూట ప్రజలందరూ సుఖసంతోషాలతో ఉండాలని ఆకాంక్షిస్తూ శుభాకాంక్షలు తెలిపారు.ఈ కార్యక్రమంలో కాంగ్రెస్ పార్టీ ముఖ్య నాయకులు, కార్యకర్తలు, స్థానిక ప్రజాప్రతినిధులు మరియు వివిధ శాఖల అధికారులు పాల్గొన్నారు.