(MS8NEWS డిసెంబర్ 27): సాధారణంగా సోషల్ మీడియాలో పరిచయాలు పెళ్లికి దారితీయడం చూస్తూనే ఉంటాం. కానీ బీహార్లోని సుపౌల్ జిల్లాలో జరిగిన ఒక వివాహం ఇప్పుడు దేశవ్యాప్తంగా చర్చనీయాంశమైంది. ఇద్దరు యువతులు ఒకరినొకరు ప్రేమించుకుని, కుటుంబ సభ్యులను ఎదిరించి మరీ పెళ్లి చేసుకున్నారు.మధేపురా జిల్లాకు చెందిన పూజ (21) మరియు శంకర్పూర్ ప్రాంతానికి చెందిన కాజల్ (18).వీరిద్దరికీ రెండేళ్ల క్రితం ఇన్స్టాగ్రామ్ ద్వారా పరిచయం ఏర్పడింది. అది కాలక్రమేణా ప్రేమగా మారింది.మంగళవారం రాత్రి సుపౌల్ జిల్లాలోని ఒక ఆలయంలో వీరు వివాహం చేసుకున్నారు. ఆలయంలో అగ్నిగుండం సిద్ధంగా లేకపోవడంతో, గ్యాస్ స్టవ్ వెలిగించి దాని చుట్టూ ఏడడుగులు వేయడం విశేషం.తమకు అబ్బాయిలపై ఆసక్తి లేదని, పరస్పర అంగీకారంతోనే ఈ నిర్ణయం తీసుకున్నామని వారు స్పష్టం చేశారు. పూజ వరుడి పాత్రలో సిందూరం ధరించగా, కాజల్ వధువుగా మారింది.కుటుంబ సభ్యులు ఈ బంధాన్ని వ్యతిరేకించినప్పటికీ, వారు వెనక్కి తగ్గలేదు. ప్రస్తుతం ఈ జంట స్థానికంగా ఒక షాపింగ్ మాల్లో కలిసి పనిచేస్తూ జీవనం సాగిస్తున్నారు. “మా బంధం మానసిక అనుబంధంపై ఆధారపడి ఉందని, చచ్చే వరకు కలిసి ఉంటామని” ఈ జంట మీడియాకు తెలిపారు.
గమనిక: భారతదేశంలో స్వలింగ సంపర్కం నేరం కాకపోయినప్పటికీ, స్వలింగ వివాహాలకు ఇంకా చట్టబద్ధమైన గుర్తింపు లభించలేదు. అయినప్పటికీ, ఈ జంట ధైర్యం సోషల్ మీడియాలో వైరల్ అవుతోంది.