(MS8NEWS డిసెంబర్ 20) : కొమురం భీం ఆసిఫాబాద్ జిల్లా వాంకిడి మండల కేంద్రంలో ఉద్రిక్తత చోటుచేసుకుంది. స్థానిక కస్తూర్బా గాంధీ బాలికల విద్యాలయంలోని స్పెషల్ ఆఫీసర్ (SO) మీనా తీరును నిరసిస్తూ విద్యార్థినులు రోడ్డుపైకి వచ్చి ధర్నాకు దిగారు. విద్యాలయం నుండి భారీ సంఖ్యలో తరలివచ్చిన విద్యార్థినులు తహసీల్దార్ కార్యాలయం ముందు బైఠాయించారు.స్పెషల్ ఆఫీసర్ మీనా తమ పట్ల అసభ్యంగా ప్రవర్తిస్తున్నారని, నిరంతరం మానసిక వేధింపులకు గురిచేస్తున్నారని విద్యార్థినులు ఆవేదన వ్యక్తం చేశారు.వసతి గృహంలో ఎదురవుతున్న సమస్యలపై ఫిర్యాదు చేసినా పట్టించుకోకపోవడంతో, విధిలేక తాము రోడ్డు ఎక్కాల్సి వచ్చిందని వారు తెలిపారు. విద్యార్థినుల పట్ల కఠినంగా వ్యవహరిస్తూ, వేధింపులకు పాల్పడుతున్న సదరు స్పెషల్ ఆఫీసర్ను తక్షణమే విధుల్లోంచి తొలగించి, వారిపై కఠిన చర్యలు తీసుకోవాలని విద్యార్థినులు డిమాండ్ చేశారు.విద్యార్థినుల ఆందోళనతో తహసీల్దార్ కార్యాలయ పరిసరాల్లో సందడి నెలకొంది. తమకు న్యాయం జరిగే వరకు కదిలేది లేదని బాలికలు భీష్మించుకు కూర్చున్నారు. విషయం తెలుసుకున్న పోలీసులు మరియు విద్యాశాఖ అధికారులు అక్కడికి చేరుకుని విద్యార్థినులతో చర్చలు జరుపుతున్నారు. పూర్తిస్థాయి విచారణ జరిపి తగు చర్యలు తీసుకుంటామని అధికారులు హామీ ఇచ్చే ప్రయత్నం చేస్తున్నారు. వాంకిడి ప్రాంతంలోని పాఠశాలల్లో గతంలోనూ కలుషితాహారం మరియు వసతుల లేమిపై ఫిర్యాదులు వచ్చిన నేపథ్యంలో, తాజా నిరసన అధికారులకు సవాలుగా మారింది.